நெற்றிக்கண் திறப்பினும் குற்றம் குற்றமே!...

ஈசன்தான்  தன்முன் நின்று வாதிடுகிறார் என்பதை  அறிந்தும் நக்கீரர், "நெற்றிக்கண் திறப்பினும் குற்றம் குற்றமே!..." என்று கூறியதன் மூலம் அவரின் தமிழ்ப்பற்றையும், மெய் கூறும் தன்மையையும், புலமையையும் உலகறியும். மேலும் ஈசன் செய்யுளில் பிழை உள்ளதைக் குறித்து வாதிடும்போது,

"அங்கம் புழுதிபட அரிவாளில் நெய்பூசி பங்கம் படவிரண்டு கால்பரப்பி - சங்கதனைக் கீர்கீர் என அறுக்கும் நக்கீரரோ ​எம் கவியை ஆராய்ந்து சொல்லத் தக்கவன்" என்பார்.

சங்கரனார்க்கு ஏது குலம் சங்கை அரிந்துண்டு வாழ்வோம் 

அரனே, உன் போல் இரந்துண்டு வாழ்வதில்லை!.." என்பார்.
சங்கறுப்பது எங்கள் குலம் (சங்கினை அறுத்து வளையல்கள் செய்து வாழும் குலத்தைச் சேர்ந்தவர்கள் ), சங்கரனே உனக்கு ஏது குலம்?. சங்கினை அறுத்து உயிர் வாழ்வோமே தவிர உன் போல் அச்சங்கினைக் கொண்டு இரந்துண்டு(பிட்சையெடுத்து) வாழமாட்டோம் என்பதே அதன் பொருள். செய்யுளில் உள்ள பிழைக்காக இறைவனையும் எதிர்த்து வாதிட்டு வென்ற சாதனை நக்கீரரையே சாரும்.

​
ஆங்கில மோகத்தில் நாம் தமிழை அடமானம் வைத்து விட்டோமா!.. ஜப்பான், சீனா​ போன்ற நாடுகள் கல்வி, அலுவலக பயன்பாடு முதல் அனைத்திற்கும் ​​அவர்கள் தாய்மொழியிலேயே பயில்வதை நாம் கேள்விப்படுகிறோம்​. அவர்கள் தங்கள் பாரம்பரியத்தை காக்கிறார்கள், நாம் என்ன செய்கிறோம்? 

​சங்கம் வைத்து தமிழ் வளர்த்தார்கள் நம் முன்னோர்கள் என்றால், அதன் புலமை இங்கு  யார்  கண்ணுக்கு தென்பட்டது. பணவளமை தான் கண்முன் நிற்கிறது ஆங்கிலமாய். தனி மனிதனை மட்டும் ​நாம் குறை சொல்ல முடியாது, அவ்வாறு வாழும் நிலைக்கு அவன் தள்ளப் பட்டிருக்கிறான் .